साझट्युब : १३ जेठ, काठमाडौं ।
काठमाडौँ महानगरपालिकको प्रमुखमा बालेन्द्र शाह विजयी भएका छन् । शुक्रबार राष्ट्रिय सभागृहमा काठमाडौँ महानगरपालिकाको मत परिणाम सार्वजनिक गर्दै आयोगले महानगरको प्रमुखमा बालेन्द्र साह विजयी भएको घोषणा गरेको हो ।
मूलधारका राजनीतिक पार्टीहरुको दबदबा चलिरहेको समकालीन राजनीतिलाई चिरेर भारी मतान्तरका साथ त्यही युवालाई काठमाडौंवासीले आफ्नो भाग्य र भविष्य सुम्पिएका छन् ।
साहले घोषणापछि बोल्दै काठमाडौंलाई विश्वकै सुन्दर र उत्कृष्ट सहर बनाउने प्रतिवद्धता गरे । ,‘हामी सबै मिलेर अब काठमाडौंलाई देशको मात्र नभएर विश्वकै सुन्दर र उत्कृष्ट नगर बनाउन सबैले सहकार्य गर्नेछौं भन्ने आशा राखेका छौं।’
उनले काठमाडौँलाई एउटै परिवार ठानेर काम गर्ने प्रतिवद्धता जनाए । नवनिर्वाचित मेयर शाहले विजयलाई नयाँ कार्यको थालनीको रुपमा लिएको बताए । उनले अबको ५ वर्ष आफ्ना कार्ययोजनालाई पूर्ण गर्ने बताए ।
नवनिर्वाचित मेयर शाहले भने, ‘शुरुवातको रुपमा लिएका छौं । यो हाम्रो विजय मात्र नभइ कार्यको सुरुवात हो । अबको ५ वर्षमा कार्ययोजनालाई पूर्ण रुपमा कार्य सम्पन्न गर्नेछौँ । काठमाडौँलाई परिवारको रुपमा लिएका छौँ । विश्वकै सुन्दर सहर बनाउनका लागि सहकार्य गर्नेछौँ ।’
