साझाट्युव : बैशाख ९, मकवानपुर ।
हेटाैंडामा मदन भण्डारी र जीवराज आश्रितकाे शालिक तोडफोड भएको छ ।
हेटौंडा-९ मा निर्माणाधीन दिव्य बाल उद्यानमा रहेको मदन भण्डारी र जीवराज आश्रितको शालिक अज्ञात व्यक्तिहरुले बिहीवार राति तोडफोड गरेका हुन् । मदन भण्डारीको शिर भाँचेर करिब ५० मिटरको दुरीमा लगेर फालिएको अवस्थामा भेटिएको छ भने जीवराज आश्रितको शालिक पुरै उखेलेर फालिएको अवस्थामा भेटिएको छ ।
(शुक्रबार) आज बिहान पार्कमा मर्निङ वाक गर्न आएका स्थानीयले शालिक फुटाएकाे अवस्थामा देखेपछि पार्क व्यवस्थापन समितिलाई जानकारी गराएका थिए । समितिले प्रहरीलाई जानकारी गराएसँगै प्रहरीले अनुसन्धान सुरु गरेकाे छ ।
इलाका प्रहरी कार्यालय पशुपतिनगरका प्रमुख प्रहरी निरीक्षक अविनाश अधिकारीसहितको टोलीले घटनाको अनुगमन सहित अनुसन्धान थालेकाे हाे । पार्कमा अन्य कुनै संरचनालाई क्षति नगरी मात्र मदन भण्डारी र जीवराज आश्रितको शालिक तोडिनुले वडाको गौरवको योजनाको रुपमा रहेको पार्क निर्माणको लक्ष्यमा ठेस पुगेको हेटाैंडा ९ का वडा अध्यक्ष लक्ष्मण भण्डारीले बताए । उनले घटनामा संलग्नलाई कारवाहीकाे माग गरे ।
