साझाट्युव : चैत ६, हुम्ला ।
हुम्लाको नाम्खा गाउँपालिकाका स्थानीयले चुनाव अगाडि नै वडा अध्यक्ष र सदस्यहरु चयन गरेका छन् । साथानिय बासिन्दाको भेलाले जाङ, हल्जी र तिल गाउँका वडा अध्यक्ष र सदस्यहरु चुनेका हुन् ।
चुनिएका वडा अध्यक्षमा नेपाली कांग्रेसका पाल्जोर तामाङ नै दोहोरिएका छन् । त्यस्तै, सदस्यहरुमा जाङकी पुटी तामाङ, हल्जीकी छिरिङ टुङडुप र तिलका टुङडुप लामा चयन भएका नाम्खा गाउँपालिका अध्यक्ष विष्णुबहादुर तामाङ (लामा)ले बताए ।
अब औपचारिकता पूरा गर्नका लागि आगामी बैशाख ३० गते हुने स्थानीय तहको निर्वाचनमा उनीहरुको मात्रै मनोनयन दर्ता हुनेछ र उनीहरूलाई नै निर्विरोध निर्वाचित भएको घोषणा गरिने पनि गाउँपालिका अध्यक्ष लामाले बताए । उनले ‘गाउँलेहरुको भेलाले वडा अध्यक्ष र सदस्यहरु चुने र अब त्यसलाई प्रक्रिया पुर्याएर औपचारिकता दिन बाँकी छ’भने । अघिल्लो स्थानीय तह निर्वाचनताका पनि त्यस्तै भएको थियो ।
यसैगरी,गाउँपालिका अध्यक्ष तामाङले बताए अनुसार अब आगामी वैशाख ३० गते हुने स्थानीय तहको निर्वाचनमा गाउँपालिका अध्यक्ष र उपाध्यक्ष पदको लागि मात्र मतदान हुनेछ ।
