साझाट्युव : चैत ९,काठमाडौं ।
रेल दुर्घटनाबाट यदि मृत्यु भएमा मृतकका परिवारलाई सरकारले जनही ७ लाख रुपैयाँसम्मको क्षतिपूर्ति पाउने कायम गरेको छ ।
यसअन्तर्गत नेपालभित्र र नेपाल बाहिरसमेत नेपाली रेल दुर्घटनाबाट मृत्यु भएका मृतकका परिवारदेखि घाइतेसम्मलाई रकम नै उल्लेख गरि क्षतिपूर्ति र राहतको व्यवस्था मिलाइएको हो ।
राष्ट्रपति विद्यादेवी भण्डारीद्वारा मंगलबार जारी गरिएको ‘रेल्वे अध्यादेश’ अनुसार दुर्घटनापछि घाइते र मृतकका परिवारजनलाई १ लाखदेखि ७ लाखसम्मको राहत र क्षतिपूर्ति उल्लेख गरेर रेल सञ्चालन गर्ने भएको छ ।
रेल दुर्घटनामा यदि कुनै व्यक्तिलाई हानी कुनै किसिमको हानी वा नोक्सानी पुग्न गएको खण्डमा बोर्डले त्यस्तो व्यक्ति वा निजको मृत्यु भएमा मृतकको नजिकका हकवालालाई राहत तथा क्षतिपूर्ति दिने गरी रेल्वे अध्यादेश जारी गरिएको छ ।
यसैगरी,अध्यादेशमा उल्लेख भए अनुसार रेलका कुनै यात्री वा अन्य व्यक्तिलाई चोटपटक लागेकोमा चोटपटकको स्थिति हेरेर औषधि उपचार खर्चबापत १ लाख रुपैयाँसम्म क्षतिपूर्ति दिइने छ । साथै,‘कुनै व्यक्ति अङ्गभङ्ग भई निको नभई काम नलाग्ने भएमा सो अङ्गभङ्ग बापत प्रत्येक अंगको २ लाख ५० हजार रुपैयाँ र त्यस्तो अंग काम लाग्ने भए घाउ खर्चबापत १ लाख ५० हजार रुपैयाँसम्म’ उपचार खर्चको व्यवस्था मिलाएको छ ।
‘दुर्घटनाबाट कुनै व्यक्तिको मृत्यु भएमा किरिया खर्च तथा राहतबापत ७ लाख रुपैयाँ राहत दिइने’ उल्लेख भएको अध्यादेश जारी भएलगत्तै अब रेल सञ्चालनको लागि कानुनी बाटो खुला भएको छ ।
नेपाल रेल्वे कम्पनीका महाप्रबन्धक निरञ्जन झाले जानकारी दिए अनुसार तेस्रो पटक अध्यादेश जारी भएपछि रेल्वे बोर्डले रेल सञ्चालनको तयारी तीव्र पारेको छ ।गत वर्ष २०७७ असोजमा ल्याइएको दुईवटा रेल कोभिड महामारी र कानुन नहुँदा सञ्चालनमा आउन नसके पनि कम्पनीले १ फागुनदेखि भने ‘टेस्टिङ ड्राइभ’ गरिरहेको छ ।
दुई साताभित्रमा नै रेलको औपचारिक उद्घाटन गर्ने तयारीमा रहेको रेल्वे कम्पनीले जयनगर-जनकपुर-कुर्थाको ३४.९ किमी दुरीमा दिनको एकपटक सञ्चालन गर्ने तयारीमा छ। यस्तै, सामान्य सिटबाट यात्रा गर्नेलाई ७० र एसी सिटमार्फत यात्रा गर्नेलाई ३ सय गरी दुई किसिमको भाडा दर पनि कायम गरेको छ ।
