साझाट्युव : बैशाख ७, दोलखा।
दोलखामा सत्तागठबन्धनको मुख्य तयारीमा नेकपा माओवादी केन्द्र र नेपाली कांग्रेसले पालिका प्रमुख र उपप्रमुखको संख्यात्मक भागबण्डा मिलाएका छन् ।
दोलखाका ९ पालिकामध्ये नेकपा माओवादी केन्द्रले ३ प्रमुख र ३ उपप्रमुख लिनेछ , नेपाली कांग्रसले ५ पालिका प्रमुख र ४ पालिकाको उपप्रमुख लिनेछ । नेकपा एकीकृत समाजवादीले एक पालिका प्रमुख र दुई वटा पालिका उपप्रमुख लिने भएको छ ।
तर, एकीकृत समाजवादीले दुई वटा पालिका प्रमुख पाउनुपर्ने दाबी कायमै राखेको छ । एकीकृत समाजवादीका नेता शिव भण्डारीले कांग्रेसले पाँच पालिका प्रमुखको दाबीबाट चार पालिका प्रमुख लिनेगरी सहमतिमा आउने विश्वास गरेका छन् ।
नेपाली कांग्रेसका दोलखाका जिल्ला सभापति बर्मा लामाले दुई पालिका प्रमुख पाउनुपर्ने माग सुरुदेखि नै राखेको भए पनि एकीकृत समाजवादीले एक पालिका प्रमुख लिने गरी सहमतिमा पुगिएको बताएका छन्
।
‘उहाँहरुको दाबी अनुसार दुई पालिका प्रमुख भन्ने छ । तर, उहाँहरुको सहमतिमा संख्यात्मक भागवण्डा मिलाएका हौं’ लामा भन्छन्, ‘अब कुन पार्टीले कुन पालिका प्रमुख र उपप्रमुखमा उम्मेदवारी दिने भनेर टुंग्याउनेतिर लागेका छौं ।’
२०७४ को चुनावमा एमालेले दोलखाका ७ पालिका प्रमुख (भीमेश्वर नगरपालिका, जिरी नगरपालिका, गौरीशंकर गाउँपालिका,कालिञ्चोक गाउँपालिका, शैलुङ गाउँपालिका, मेलुङ गाउँपालिका, तामाकोशी गाउँपालिका ) जितेको थियो।
कांग्रेसले दोलखाका २ पालिका प्रमुख ( बैत्यश्वर गाउँपालिका र विगु गाउँपालिका ) मात्रै जितेको थियो । माओवादी केन्द्रले दुई वटा पालिका उपप्रमुख जितेको थियो । यो पटक एमाले विभाजित भएर नेकपा एकीकृत समाजवादी बनेको छ । एमाले बाहेकका दलहरु अहिले गठबन्धन बनाएर अगाडि बढेका छन् । एमाले एक्लै चुनावी मैदानमा छ ।
तर कुन–कुन पालिका प्रमुख र उपप्रमुखमा कुन कुन दलको उम्मेदवार रहने भन्ने निक्र्योल हुन बाँकी छ ।
